На 150 метри надморска височина, во село Тимјаник, Неготино и идеална клима за квалитетно грозје - се наоѓа најголемото производство на лозови и овошни садници во Македонија, „Агро калем“. Се работи за сертифицирани садници од кои лозовите се за трпезни и вински сорти, а овошните за цреши, круши, сливи, јаболки, кајсии, орев, бадем, дуња, вишна... „Агро калем“ произведува и трпезно грозје за извоз (а поседува и сопствени ладилници), и тоа од сортите страшински, молдавија, викторија, кардинал, мишел, афус али, атика. Сопственичката на „Агро калем“ Васка Мојсовска, го води и здружението „Шира“ во рамките на кое се произведува маџун (познат како лек за подобар имунитет) и други производи од грозје. Цената на тегла маџун од 370 ml чини 300, а поголемите тегли 500 денари.